বদসি যদি কিঞ্চিদপি দন্তরুচিকৌমুদী হরতি দরতিমিরমতিঘোরম্।
স্ফুরদধরসীধবে তব বদন-চন্দ্রমা রোচয়তি লোচন-চকোরম্।।
প্রিয়ে চারুশীলে মুঞ্চ ময়ি মানমনিদানম্।
সপদি মদনানলো দহতি মম মানসং দেহি মুখকমলমধুপানম্।।ধ্রু।।
সত্যমেবাসি যদি সুদতি ময়ি কোপিনী দেহি খরনয়নশরঘাতম্।
ঘটয় ভুজবন্ধনং জনয় রদখণ্ডনম্ যেন বা ভবতি সুখজাতম্।।
ত্বমসি মম ভূষণং ত্বমসি মম জীবনং ত্বমসি মম ভবজলধিরত্নম্।
ভবতু ভবতীহ ময়ি সততমনুরোধিনী তত্র মম হৃদমতিযত্নম্।।
নীলনলিনাভমপি তন্বি তব লোচনম্ ধারয়তি কোকনদরূপম্‌।
কুসুমশরবাণভাবেন যদি রঞ্জয়সি কৃষ্ণমিদমেতদনুরূপম্।
স্ফুরতু কুচকুম্ভয়োরুপরি মণিমঞ্জরী রঞ্জযতু তব হৃদয়দেশম্।
রসতু রসনাপি তব ঘন-জঘন-মণ্ডলে ঘোষয়তু মন্মথনিদেশম্।।
স্থলকমলগঞ্জনং মম হৃদয়রঞ্জনং জনিত-রতি-রঙ্গ-পরভাগম্।
ভণ মসৃণবাণি করবাণি চরণদ্বয়ং সরসলসদলক্তকরাগম্।।
স্মরগরলখণ্ডনং মম শিরসি মণ্ডনম্ দেহি পদপল্লবমুদারম্।
জ্বলতি ময়ি দারুণো মদনকদনানলো হরতু তদুপাহিতবিকারম্।।
ইতি চটুলচাটুপটুচারু মরুবৈরিণোরাধিকামধি বচনজাতম্।
জয়তি পদ্মাবতীরমণজয়দেবকবিভারতীভণিতমতিশাতম্।।