মামিয়ং চলিতা বিলোক্য বৃতং বধূনিচয়েন।
সাপরাধতরা ময়াপি ন বারিতাতিভয়েন।।
হরি হরি হতাদরতয়া গতা সা কুপিতেব।।ধ্রু।।
কিং করিষ্যতি কিং বদিষ্যতি সা চিরং বিরহেণ।
কিং ধনেন জনেন কিং মম জীবিতেন গৃহেণ।।
চিন্তয়ামি তদাননং কুটিলভ্রু কোপভরেণ।
শোণপদ্মমিবোপরি ভ্রমতাকুলং ভ্রমরেণ।।
তামহং হৃদি সঙ্গতামনিশং ভৃশং রময়ামি।।
কিং বনেঽনুসরামি তামিহ কিং বৃথা বিলপামি।।
তন্বি খিন্নমসূয়য়া হৃদয়ং তবাকলয়ামি।
তন্ন বেদ্মি কুতো গতাসি ন তেন তেঽনুনয়ামি।।
দৃশ্যসে পুরতো গতাগতমেব মে বিদধাসি।
কিং পুরের সসম্ভ্রমং পরিরম্ভণং ন দদাসি।।
ক্ষম্যতামপরং কদাপি তবেদৃশং ন করোমি।
দেহি সুন্দরি দর্শনং মম মন্মথেন দুনোমি।।
বর্ণিতং জয়দেবকেন হরেরিদং প্রবণেন।
কেন্দুবিল্বসমুদ্রসম্ভবরোহিণীরমণেন।।