স্তনবিনিহিতমপি হারমুদারম্।
সা মনুতে কৃশতনুরিব ভারম্।।
রাখিকা তব বিরহে কেশব।।ধ্রু।।
সরসমসৃণমপি মলয়জপঙ্কম্।
পশ্যতি বিষমিব বপুষি সশঙ্কম্।।
শ্বসিতপবনমনুপমপরিণাহম্।।
মদনদহনমিব বহতি সদাহম্।।
দিশি দিশি কিরতি সজলকণজালম্।
নয়ননলিনমিব বিদলিতনালম্।।
নয়নবিষয়মপি কিশলয়তল্পম্।
গণয়তি বিহিতহুতাশবিকল্পম্।।
ত্যজতি ন পাণিতলেন কপোলম্।
বালশশিনমিব সায়মলোলম্।।
হরিরিতি হরিরিতি জপতি সকামম্।।
বিরহবিহিতমরণেব নিকামম্।।
শ্রীজয়দেবভণিতমিতি গীতম্।
সুখয়তু কেশবপদমুপনীতম্।।