দ্বিতীয় সর্গ – অক্লেশ কেশব
বিহরতি বনে রাধা সাধারণপ্রণয়ে হরৌ
বিগলিতনিজোৎকর্যাদীর্ষ্যবশেন গতান্যতঃ |
ক্কচিদপি লতাকুঞ্জে গুঞ্জন্মধুব্রতমণ্ডলী-
মুখরশিখরে লীলা দীনাপ্যুবাচ রহঃ সখীম্ ||১||
গীতম্
গুর্জ্জরীরাগযতিতালাভ্যাং গীয়তে
সঞ্চরদধরসুধামধুরধ্বনিমুখরিতমোহনবংশম্ |
বলিতদৃগঞ্চলচঞ্চলমৌলিকপোলবিলোলবতংসম্ ||
রাসে হরিমিহ বিহিতবিলাসম্ |
স্মরতি মনো মম কৃতপরিহাসম্ ||২||
চন্দ্রকচারুময়ূরশিখণ্ডকমণ্ডলবলয়িতকেশম্ |
প্রচুরপুরন্দরধনুরনুরঞ্জিতমেদুরমুদিরসুবেশম্ ||৩||
গোপকদম্বনিতম্ববতীমুখচুম্বনলম্ভিতলোভম্ |
বন্ধুজীবমধুরাধর-পল্লবমুল্লসিতস্মিতশোভম্ ||৪||
বিপুলপুলকভুজপল্লববলয়িতবল্লবযুবতিসহস্রম্ |
করচরণোরসি মণিগণভূষণকিরণবিভিন্নতমিস্রম্ ||৫||
জলদপটলবলদিন্দুবিনিন্দচন্দনতিলকললাটম্ |
পীনপয়োধরপরিসরমর্দ্দননির্দ্দয়হৃদয়কবাটম্ ||৬||
মণিময়মকরমনোহরকুণ্ডলমণ্ডিতগণ্ডমুদারম্ |
পীতবসনমনুগতমুনিমনুজসুরবরপরিবারম্ ||৭||
বিশদকদম্বতলে মিলিতং কলিকলুষভয়ং শময়ন্তম্ |
মামপি কিমপি তরঙ্গদনঙ্গদৃশা মনসা রময়ন্তম্ ||৮||
শ্রীজয়দেবভণিতমতিসুন্দর-মোহন-মধুরিপুরূপম্ |
হরিচরণস্মরণং প্রতি সংপ্রতিপুণ্যবতামনুরূপম্ ||৯||
গীতম্
মালবরাগৈকতালী তালাভ্যাং গীয়তে
নিভৃতনিকুঞ্জগৃহংগতয়া নিশি রহসি নিলীয় বসন্তম্
চকিতবিলোকিতসকলদিশা রতিরভসরসেন হসন্তম্ |
সখি হে কেশিমথনমুদারম্
রময় ময়া সহ মদনমনোরথভাবিতয়া সবিকারম্ ||১০||
প্রথমসমাগমলজ্জিতয়া পটুচাটুশতৈরনুকূলম্ |
মৃদুমদধুরস্মিতভাষিতয়া শিথিলীকৃতজঘনদুকূলম্ ||১১||
কিশলয়শয়ননিবেশিতয়া চিরমুরসি মমৈব শয়ানম্ |
কৃতপরিরম্ভণ-চুম্বনয়া পরিরভ্য কৃতাধরপানম্ ||১২||
অলসনিমীলিতলোচনয়া পুলকাবলিললিতকপোলম্ |
শ্রমজলসকলকলেবরয়া বরমদনমদাদতিলোলম্ ||১৩||
কোকিলকলরবকূজিতয়া জিতমনসিজ-তন্ত্রবিচারম্ |
শ্লথকুসুমাকুলকুন্তলয়া নখলিখিতঘনস্তনভারম্ ||১৪||
চরণরণিতমণিনূপুরয়া পরিপুরিতসুরতবিতানম্ |
মুখরবিশৃঙ্খলমেখলয়া সকচগ্রহচুম্বনদানম্ ||১৫||
রতিসুখসময়-পসালসয়া দরমুকুলিতনয়নসরোজম্ |
নিঃসহনিপতিততনুলতয়া মধুসূধনমুদিতমনোজম্ ||১৬||
শ্রীজয়দেবভণিতমিদমতিশয়মধুরিপুনিধুবনশীলম্ |
সুখমুত্কণ্ঠিতগোপবধূকথিতং বিতনোতুধূসলীলম্ ||১৭||
হস্তস্রস্তবিলাসবংশমনৃজু-ভ্রূবল্লিমদ্বল্লবী-
বৃন্দোত্সারি-দৃগন্তবীক্ষিতমতিস্বেদার্দগণ্ডস্থলম্ |
মামুদ্বীক্ষ্য বিলক্ষিতস্মিতসুধামুগ্ধাননং কাননে
গোবিন্দং ব্রজসুন্দরীগণবৃতং পশ্যামি হৃষ্যামি চ ||১৮||
দুরালোকঃ স্তোকস্তবক-নবকাশোকলতিকা-
বিকাশঃ কাসারোপবনপবনোহপি ব্যথয়তি |
অপি ভ্রাম্যদ্ভৃঙ্গীরণিতরমণীয়া ন মুকুল-
প্রসূতিশ্চূতানাং সখি শিখরিণীয়ং সুখয়তি ||১৯||
সাকূতস্মিতাকুলাকুলগলদ্ধম্মিল্লমুল্লাসিত-
ভ্রূবল্লীকমলীকদর্শিতভুজামূলার্ধদৃষ্টস্তনম্ |
গোপীনাং নিভৃতং নিরীক্ষ্য গম্তাকাঙ্ক্ষশ্চিরং চিন্চয়-
ম্নন্তমুর্গ্ধমনোহরং হরতু বঃ ক্লেশং নবঃ কেশবঃ ||২০||