অষ্টম সর্গ – বিলক্ষ লক্ষ্মীপতি

অথ কথমপি যামিনীং বিনীয়
স্মরশরজর্জ্জরিতাপি সা প্রভাতে |
অনুনয়বচনং বদস্তমগ্রে
প্রণতমপি প্রিয়মাহ সাভ্যসূষম্ ||১||

গীতম্
ভৈরবীরাগযতিতালাভ্যং গীয়তে

রজনিজনিতগুরুজাগররাগকষায়িতমলসনিমেষম্
বহতি নয়নমনুরাগমিব স্ফুটমুদিতরসাভিনিবেশম্ |
হরি হরি যাহি মাধব যাহি কেশব মা বদ কৈতববাদম্
তামনুসর সরসীরুহলোচন যা তব হরতি বিষাদম্ ||২||

কজ্জলমলিনবিলোচনচুম্বনবিরচিতনী লিমরূপম্ |
দশনবসনমরুণং তব কৃষ্ণ তনোতি তনোরনুরূপম্ ||৩||

বপুরনুহরতি তব স্মরসঙ্গরখরনখরক্ষতরেখম্ |
মরকতশকলকলিতকলধৌতরিপেরিব রতিজয়লেখম্ ||৪||

চরণকমলগলদলক্তকসিক্তমিদং তব হৃদয়মুদারম্
দর্শয়তীব বহির্মদনদ্রুমনবকিশলয়পরিবারম্ ||৫||

দশনপদং ভবদধরগতং মম জনয়তি চেতসি খেদম্ |
কথয়তি কথমধুনাপি ময়া সহ তব বপুরেতদভেদম্ ||৬||

বহিরিব মলিনতরং তব কৃষ্ণ মনোহপি ভভিষ্যতি নূনম্ |
কথমথ বঞ্চয়সে জনমনুগতমসমশরজ্বরদূনম্ ||৭||

ভ্রমতি ভবানবলাকবলায় বনেষু কিমত্র বিচিত্রম্ |
প্রথয়তি পূতনিকৈব বধুবধনির্দ্দয়বালচরিত্রম্ ||৮||

শ্রীজয়দেবভণিতরতিবঞ্চিতখণ্ডিতযুবতিবিলাপম্ |
শৃণুত সুধামধুরং বিবুধা বিবুধালয়তোহপি দুরাপম্ ||৯||

তবেদং পশ্যংত্যাঃ প্রসরদনুরাগং বহিরিব
প্রিয়াপাদালক্তচ্ছুরিতমরুণচ্ছায়হৃদয়ম্ |
মমাদ্য প্রখ্যাতপ্রণয়ভরভঙ্গেন কিতব
ত্বদালোকঃ শোকাদপি কিমপি লজ্জাং জনয়তি ||১০||

অন্তর্মোহনমৌলিঘুণনচলন্মন্দারবিস্রংসন-
স্তব্ধাকর্ষণদৃষ্টিহর্ষণমহামন্ত্রঃ কুরঙ্গীদৃশাম্ |
দৃপ্যদ্দানবদূয়মানদিবিষদ্দুর্ব্বরদুঃখাপদাং
ভ্রংশঃ কংসরিপোর্ব্যপোহয়তু বঃ শ্রেয়াংসি বংশীরবঃ ||১১||