তৃতীয় সর্গ – মুগ্ধ মধুসূদন

কংসারিরপি সংসার-বাসনাবদ্ধশৃঙ্খলাম্ |
রাধামাধায় হৃদয়ে তত্যাজ ব্রজসুন্দরীঃ ||১||

ইতস্ততস্তামনুসৃত্য রাধিকামনঙ্গবাণ-ব্রণখিন্নমানসঃ |
কৃতানুতাপঃ স কলিন্দনন্দিনীতটান্তকুঞ্জে বিষসাদ মাধবঃ ||২||

গীতম্
গুর্জ্জরীরাগেণ যতিতালেন চ গীয়তে

মামিয়ং চলিতা বিলোক্য বৃতং বধূনিচয়েন |
সাপরাধতয়া ময়াপি ন বারিতাতিভয়েন |
হরি হরি হতাদরতয়া গতা সা কুপিতেব ||৩||

কিং করিষ্যতি কিং বদিষ্যতি সা চিরং বিরহেণ |
কিং ধনেন জনেন কিং মম জীবিতেন গৃহেণ ||৪||

চিন্তয়ামি তদাননং কুটিলভ্রু কোপভরেণ |
শোণপদ্বমিবোপরি ভ্রমতাকুলং ভ্রমরেণ ||৫||

তামহংহৃদি সঙ্গতামনিশং ভৃশং রময়ামি |
কিং বনেহনুসরামি তামিহ কিং বৃথা বিলপামি ||৬||

তন্বি খিন্নমসূয়য়া হৃদয়ংতবাকলয়ামি |
তন্ন বেদ্মি কুতো গতাসি ন তেন তেহনুনয়ামি ||৭||

দৃশ্যতে পুরতো গতাগতমেব মে বিদধাসি |
কিং পুরেব সসম্ভ্রমং পরিরম্ভণং ন দদাসি ||৮||

ক্ষম্যতামপরং কদাপি তবেদৃশং ন করোমি |
দেহি সুন্দরী দর্শনং মম মন্মথেন দুনোমি ||৯||

বর্ণিতং জয়দেবকেন হরেরিদং প্রবণেন |
কেন্দুবিল্বসমুদ্রসম্ভববরোহিণীরমণেন ||১০||

হৃদি বিসলতাহারো নায়ং ভুজঙ্গমনায়কঃ
কুবলয়দলশ্রেণী কণ্ঠে ন সা গরলদ্যুতিঃ |
মলয়জরজো নেদং ভস্ম প্রিয়ারহিতে ময়ি
প্রহর ন হরভ্রান্ত্যানঙ্গ ক্রুধা কিমু ধাবসি ||১১||

পাণৌ মা কুরু চূতসায়কমমুং মা চাপমারোপর
ক্রীড়ানির্জ্জিতবিশ্বমুর্চ্ছিতজনাঘাতেন কিং পৌরুষম্ |
তস্যা এব মৃগীদৃশো মনসিজপ্রেঙ্খত্কটাক্ষাশুগ-
শ্রেণীজর্জ্জরিতং মনাগপি মনো নাদ্যাপি সংধুক্ষতে ||১২||

ভ্রুপল্লবং ধনুরপাঙ্গতরঙ্গিতানি
বাণা গুণঃ শ্রবণপালিরিতি স্মরেণ |
তস্যামনঙ্গজয়জঙ্গমদেবতায়া-
মস্ত্রাণি নির্জ্জিতজগন্তি কিমর্পিতানি ||১৩||

তানি স্পর্শসুখানি তে চ তরলাঃ স্নিগ্ধা দিশোর্বিভ্রুমা-
স্তদক্ত্রাম্বুজসৌরভং স চ সুধাস্যন্দী গিরাং বক্রিমা |
সা বিম্বাধরমাধুরীতি বিষয়াসঙ্গেহপি চেন্মানসং
তস্যাং লগ্নসমাধি হস্ত বিরহব্যাধিঃ কথং বর্ধতে ||১৪||

তির্যককণ্ঠবিলোলমৌলিতরলোত্তংসস্য বংশোচ্চরদ-
গীতিস্থানকৃতাবধানললনালক্ষৈর্ন সংলক্ষিতাঃ |
সম্মুগ্ধং মধুসূদনস্য মধুরে রাধামুখেন্দৌ মৃদুস্পন্দং
কন্দলিতাশ্চিরং দধতু বঃ ক্ষেমৎ কটাক্ষোর্ময়ঃ ||১৫||