দশম সর্গ – মুগ্ধ-মাধব

অত্রান্তরে মসৃণরোষবশামসীম-নিঃশ্বাসনিঃসহমুখীং সুমুখীমুপেত্য |
সব্রীড়মীক্ষিতসখীবদনাং প্রদোষে সানন্দগদগদপদং হরিরিত্যুবাচ ||১||

গীতম্
দেশবরাড়ীরাগাষ্টতালাভ্যং গীয়তে

বদসি যদি কিঞ্চিদপি দন্তরুচিকৌমুদী হরতি দরতিমিরমতিঘোরম্ |
স্ফুরধরসীধবে তব বদনচন্দ্রমা রোচয়তি লোচন-চকোরম্ ||২||

প্রিয়ে চারুশীলে মুঞ্চ ময়ি মানমনিদানম্ |
সপদি মদনানলো দহতি মম মানসম্ দেহি মুখকমলমধুপানম্ ||৩||

সত্যমেবাসি যদি সুদতি ময়ি কোপিনী দেহি খরনয়নশরঘাতম্ |
ঘটয় ভুজবন্ধনং জনয় রদখণ্ডনম্ যেন বা ভবতি সুখজাতম্ ||৪||

ত্বমসি মম ভূষণং ত্বমসি মম জীবনম্ ত্বমসি মম জলধিরত্নম্ |
ভবতু ভবতীহ ময়ি সততমনুরোধিনী তত্র মম হৃদয়মতিযত্নম্ ||৫||

নীলনলিনাভমপি তন্বি তব লোচনম্ ধারয়তি কোকনদরূপম্ |
কুসুমশর-বাণ-ভাবেন যদি রঞ্জয়সি কৃষ্ণমিদমেতদনুরূপম্ ||৬||

স্ফুরতু কুচকুম্ভয়োরুপরি মণিমঞ্জরী রঞ্জয়তু তব হৃদয়দেশম্ |
রসতু রসনাপি তব ঘনজঘনমণ্ডলে ঘোষয়তু মন্মথনিদেশম্ ||৭||

স্থলকমলগঞ্জনং মম হৃদয়রঞ্জনম্ জনিত-রতি-রঙ্গ-পরভাগম্ |
ভণ মসৃণ-বাণি করবাণি চরণদ্বয়ং সরস-লসদলক্তকরাগম্ ||৮||

স্মর-গরল-খণ্ডনং মম শিরসিমণ্ডনম্ দেহি পদপল্লবমুদারম্ |
জ্বলতি ময়ি দারুণো মদনকদনানলো হরতু তদুপাহিতবিকারম্ ||৯||

ইতি চটুল-চাটু-পটু-চারু মুবৈরিণো রাধিকামধি বচনজাতম্ |
জয়তি পদ্মাবতী-রমণ-জয়দেবকবি-ভারতী-ভণিতমতিশাতম্ ||১০||

পরিহর কৃতাতঙ্কে শঙ্কাং ত্বয়া সততং ঘনস্তন-
জঘনয়াক্রান্তে স্বাস্তে পরানবকাশিনি |
বিশতি বিতনোরন্যো ধন্যা ন কোহপি মমান্তরং
প্রণয়িনি পরীরম্ভারম্ভে বিধেহি বিধেয়তাম্ ||১১||

মুগ্ধে বিধেহি ময়ি নিদয়দন্তদংশদোবল্লিবন্ধ-নিবিড়-স্তনপীড়নানি |
চণ্ডি ত্বমেব মুদমঞ্চ ন পঞ্চবাণ চণ্ডালকাণ্ড-দলনাদসবঃ প্রয়ান্তু ||১২||

শশিমুখি তব ভাতি ভঙ্গুর-ভ্রূ-যুবজনমোহ-করাল-কালসর্পী |
তদুদিত-ভয়ভঞ্জনায় যূনাম্ ত্বদধর-সীধু-সুধৈব সিদ্ধমন্ত্রঃ ||১৩||

ব্যথয়তি বৃথা মৌনং তন্বি প্রপঞ্চয় পঞ্চমং
তরুণি মধুরালাপৈস্তাপং বিনোদয় দৃষ্টিভিঃ |
সুমুখি বিমুখিভাবং তাবদ্বিমুঞ্চ ন মুঞ্চ মাং
স্বয়মতিশয়-স্নিগ্ধো মুগ্ধে প্রিয়োহয়মুপস্থিতঃ ||১৪||

বন্ধুকদ্যতিবান্ধবোহয়মধরঃ স্নিগ্ধো মধুকচ্ছবি-
র্গণ্ডে চণ্ডি চকাস্তি নীলনলিনশ্রীমোচনং লোচনম্ |
নাসাভ্যেতি তিলপ্রসুন-পদবীং কুন্দাভদন্তি প্রিয়ে
প্রায়স্ত্বন্মুখসেবয়া বিজয়তে বিশ্বং স পুষ্পায়ুধঃ ||১৫||

দৃশোতব মদালসে বদনমিন্দুসন্দীপনম্
গতির্জনমনোরমা বিজিতরম্ভমুরুদ্বয়ম্ |
রতিস্তব কলাবতী রুচিরচিত্রলেখে ভ্রুবা-
বহো বিবুধ-যৌবতং বহসি তন্বি পৃথ্বীগতা ||১৬||

প্রীতিং বস্তনুতাং হরিঃ কুবলয়াপীড়েন সার্দ্ধং রণে
রাধাপীনপয়োধরস্মরণকৃত্কুম্ভেন সম্ভেববান |
যত্র স্বিদ্যতি মীলতি ক্ষণমথ ক্ষিপ্তে দ্বিপে তত্ক্ষণাৎ
কংসস্যালমভুজ্জিতং জিতমিতি ব্যামোহকোলাহলঃ ||১৭||