পঞ্চম সর্গ – সাকাঙ্ক্ষ পুণ্ডরীকাক্ষ
অহমিহ নিবসামি যাহি রাধামনুনয় মদ্বচনেন চানয়েথাঃ |
ইতি মধুরিপুণা সখী নিযুক্তা স্বয়মিদমেত্য পুনর্জগাদ রাধাম্ ||১||
গীতম্
দেশবরাড়ীরাগরূপকতালাভ্যাং গীয়তে
বহতি মলয়সমীরে মদনমুপনিধায়
স্ফুটতি কুসুমনিকরে বিরহিহৃদয়দলনায় |
সখি হে সীদতি তব বিরহে বনমালী ||২||
দহতি শিশিরময়ূখে মরণমনুকরোতি
পততি মদনবিশিখে বিলপতি বিকলতরোহতি ||৩||
ধ্বনিত মধুপসমুহে শ্রবণমপিদধাতি |
মনসি বলিতবিরহে নিশি নিশি রুজমুপযাতি ||৪||
বসতি বিপিনবিতানে ত্যজতি ললিতধাম |
লুঠতি ধরণিশয়নে বহু বিলপতি তব নাম ||৫||
ভণতি কবিজয়দেবে হরিবিরহবিলসিতেন
মনসি রভসবিভবে হরিরুদয়তু সুকৃতেন ||৬||
পূর্ব্বং যত্র সমং ত্বয়া রতিপতেরাসাদিতাঃ সিদ্ধয়-
স্তস্মিন্নেব নিকুঞ্জমন্মথমহাতীর্থে পুনর্মাধবঃ |
ধ্যায়ংস্ত্বামনিশং জপন্নপি তবৈবালাপমন্ত্রাক্ষরং
ভুয়স্তত্কুচকুম্ভনির্ভরপরীরম্ভামৃতং বাঞ্ছতি ||৭||
গীতম্
দেশবরাড়ীরাগরূপকতালাভ্যাং গীয়তে
রতিসুখসারে গতমভিসারে মদনমনোহরবেশম্ |
ন কুরু নিতম্বিনি গমনবিলম্বনমনুসর তং হৃদয়েশম্ ||৮||
ধীরসমীরে যমুনাতীরে বসতি বনে বনমালী |
পীনপয়োধরপরিসরমর্দ্দনচঞ্চলকরযুগশালী ||৯||
নামসমেতং কৃতসঙ্কেতং বাদয়তে মৃদু বেণুম্ |
বহু মনুতে ননু তে তনুসঙ্গতপবনচলিতমপি বেণুম্ ||১০||
পততি পতত্রে বিচলিত পত্রে শঙ্কিতভবদুপযানম্ |
রচয়তি শয়নং সচকিতনয়নং পশ্যতি তব পন্থানম্ ||১১||
মুখরমধীরং ত্যজ মঞ্জীরং রিপুমিব কেলিষু লোলম্ |
চল সখি কুঞ্জং সতিমিরপুঞ্জং শীলয় নীলনিচোলম্ ||১২||
উরসি মুরারেরুপহিতহারে ঘন ইব তরলবলাকে |
তড়িদিব পীতে রতিবিপরীতে রাজসি সুকৃতবিপাকে ||১৩||
বিগলিত বসনং পরিহৃতরসনং ঘটয় জঘনমপিধানম্ |
কিশলয়শয়নে পঙ্কজনয়নে নিধিমিব হর্ষনিধানম্ ||১৪||
হরিরভিমানা রজনিরিদানীমিয়মপি যাতি বিরামম্ |
কুরু মম বচনং সত্বররচনং পূরয় মধুরিপুকামম্ ||১৫||
শ্রীজয়দেবে কৃতহরিসেবে ভণতি পরমরমণীয়ম্ |
প্রমুদিতহৃদয়ং হরিমতিসদয়ং নমত সুকৃতকমনীয়ম্ ||১৬||
বিকরতি মুহুঃ শ্বাসানাশাঃ পুরো মুহুরীক্ষতে |
প্রবিশতি মুহুঃ কুঞ্জং গুঞ্জুন্মুহুর্বহু তাম্যতি |
রচয়তি মুহুঃ শয্যাং পর্যাকুলং মুহুরীক্ষতে
মদনকদনক্লান্তঃ কান্তে প্রিয়স্তব বর্ত্ততে ||১৭||
তদ্বাম্যেন সমং সমগ্রমধুনা তিগ্মাংশুরস্তং গতো
গোবিন্দস্য মনোরথেন চ সমং প্রাপ্তং তমং সান্দ্রতাম্ |
কোকানাং করুণস্বনেন সদৃশী দীর্ঘা মদভ্যর্থনা
তন্মুগ্ধে বিফলং বিলম্বনমসৌ রম্যোহভিসারক্ষণঃ ||১৮||
আশ্লেষাদনু চুম্বনাদনু নখোল্লেখাদনু স্বাস্তজ
প্রোদ্বোধাদনু সংভ্রমাদনু রতারম্ভাদনু প্রীতয়োঃ |
অন্যার্থং গতয়োর্ভ্রমান্মিলিতয়োঃ সম্ভাষণৈর্নতো-
র্দম্পত্যোরিহ ক ন কো ন তমসি ব্রীড়াবিমিশ্রো রসঃ ||১৯||
সভয়চকিতং বিন্যস্যন্তীং দৃশৌ তিমিরে পথি
প্রতিতরু মুহুঃ স্থিত্বা মন্দং পদানি বিতম্বতীম্ |
কথমপি রহঃ প্রাপ্তামঙ্গৈরমঙ্গতরঙ্গিভিঃ
সুমুখি সুভগঃ পশ্যন্ ত্বামুপৈতু কৃতার্থতাম্ ||২০||
রাধামুগ্ধমুখারবিন্দ-মধুপস্ত্রৈলোক্যমৌলিস্থলী-
নেপথ্যোচিত-নীলরত্নমবনী-ভারাবতারান্তকঃ |
স্বচ্ছন্দং ব্রজসুন্দরীজন-মনস্তোষ-প্রদোষশ্চিরং
কংসধ্বংসন-ধূমকেতুরবতু ত্বাং দেবকীনন্দনঃ ||২১||