একাদশ সর্গ – সানন্দ-গোবিন্দ
সুচিরমনুনয়েন প্রীণয়িত্বা মৃগাক্ষীম্
গতবতি কৃতবেশে কেশবে কুঞ্জশয্যাম্ |
রচিতরুচিরভুষাং দৃষ্টিমোষে প্রদোষে
স্ফুরতি নিরবসাদাং কাপি রাধাং জগাদ ||১||
গীতম্
বসন্তরাগযতিতালাভ্যং গীয়তে
বিরচিতচাটুবচনরচনং চরণে রচিত-প্রণিপাতম্
সম্প্রতি মঞ্জুলবঞ্জুলসীমনি কেলিশয়নমনুযাতম্
মুগ্ধে মধু-মথনমনুগতমনুসর রাধিকে ||২||
ঘনজঘনস্তনভারভরে দরমন্থরচরণবিহারম্ |
মুখরিতমণিমঞ্জীরমুপৈহি বিধেহি মরালনিকারম্ ||৩||
শৃণু রমণীয়তরং তরুণীজনমোহনমধুরিপুরাবম্ |
কুসুমশরাসনশাসনবন্দিনি পিকনিকরে ভজ ভাবম্ ||৪||
অনিলতরলকিশলয়নিকরেণ করেণ লতানিকুরুম্বম্ |
প্রেরণমিব করভোরু করোতি গতিং প্রতি মুঞ্চ বিলম্বন ||৫||
স্ফুরিতমনঙ্গতরঙ্গবশাদিব সূচিতহরিপরিরম্ভম্ |
পৃচ্ছ মনোহরহারবিমলজলধারমমুং কুচকুম্ভং ||৬||
অধিতমখিলসখীভিরিদং তব বপুরপি রতিরণসজ্জম্ |
চণ্ডি রণিত-রসনা-রব-ডিণ্ডিমমভিসার সরসমলজ্জম্ ||৭||
স্মর-শর-সুভগ-নখেন করেণ সখীমবলম্ব্য সলীলম্ |
চল বলয়ক্কণিতৈরববোধয় হরিমপি নিজগতিশীলম্ ||৮||
শ্রীজয়দেবভণিতমধরীকৃতহারমুদাসিতবামম্ |
হরিবিনিহিতমনসামধিতিষ্ঠতু কণ্ঠতটীমবিরারম্ ||৯||
স মাং দ্রক্ষ্যতি বক্ষ্যতি স্মরকথাং প্রত্যঙ্গমালিঙ্গনৈঃ
প্রাতিং যাস্যতি রংস্যতে সখি সমাগত্যেতি সঞ্চিন্তায়ন |
স ত্বাং পশ্যতি বেপতে পুলকয়ত্যানন্দতি স্বিদ্যতি
প্রত্যুদ্গচ্ছতি মূর্চ্ছতি স্থিরতমঃপুঞ্জে নিকুঞ্জে প্রিয়ঃ ||১০||
অক্ষ্ণর্নিক্ষিপদঞ্জনং শ্রবণয়োস্তাপিঞ্ছগুচ্ছাবলিং
মুর্ধ্রিশ্যামসরোজদাম কুচয়োঃ কস্তূরিকাপত্রকম্ |
ধুর্ত্তানামভিসারসত্বরহৃদাং বিম্বঙ্নিকুঞ্জে সখি
ধ্বান্তং নীলনিচোলচারু সুদৃশাং প্রত্যঙ্গমালিঙ্গতি ||১১||
কাশ্মীর-গৌর-বপুষামভিসারিকাণা-
মাধদ্ধরেখমভিতো রুচিমঞ্জরীভিঃ |
এতত্তমালদল-নীলতমং তমিস্রং
তৎপ্রেমহেমনিকষোপলতাং তনোতি ||১২||
হারাবলিতরলকাঞ্চনকাঞ্চিদামমঞ্জীরকঙ্কণমণিদ্যুতিদীপিতস্য |
দ্বারে নিকুঞ্জনিলয়স্য হরিং বিলোক্য ব্রীড়াবতীমথ সখীমিয়মিত্যুবাচ ||১৩||
গীতম্
দেশবরাড়ীরাগরূপকতালাভ্যং গীয়তে
মঞ্জুতরকুঞ্জতলকেলিসদনে
বিলস রতি-রভসহসিতবদনে |
প্রবিশ রাধে মাধব-সমীপমিহ ||১৪||
নবভবদশোকদলশয়নসারে |
বিলস কুচকলসতরলহারে ||১৫||
কুসুমচয়কচিতশুচিবাসগেহে |
বিলস কুসুমসুকুমারদেহে ||১৬||
চলমলয়বনপবনসুরভিশাতে |
বিসল রতিবলিতললিতগীতে ||১৭||
বিততবহুবল্লিনবপল্লবঘনে |
বিলস চিরমলসপীনজঘনে ||১৮||
মধুমুদিতমধুপকুলকলিতরাবে |
বিলস মদনরসসরসভাবে ||১৯||
মধুরতরপিকনিকরনিনাদমুখরে |
বিলস দশনরুচিরুচিরশিখরে ||২০||
বিহিতপদ্মাবতীসুখসমাজে
কুরু মুরারে মঙ্গলশতানি |
ভণতি জয়দেব-কবিরাজ-রাজে ||২১||
ত্বাং চিত্তেন চিরং বহন্নয়মতিশ্রান্তো ভৃশন্তাপিতঃ
কন্দর্পেণ চ পাতুমিচ্ছতি সুধাসম্বাধবিম্বাধরম্ |
অস্যঙ্কং তদলঙ্কুরু ক্ষণমিহ ভ্রূক্ষেপলক্ষ্মীলব-
ক্রীতে দাস ইবোপসেবিতপদাম্ভোজে কুতঃ সম্ভ্রমঃ ||২২||
সা সসাধ্বস-সানন্দং গোবিন্দে লোললোচনা |
শিঞ্জানমঞ্জুমঞ্জীরং প্রবিবেশ নিবেশনম্ ||২৩||
গীতম্
বরাড়ীরাগরূপকতালাভ্যং গীয়তে
রাধাবদনবিলোকন-বিকসিত-বিবিধবিকারবিভঙ্গম্
জলনিধিমিব বিধুমণ্ডদর্শণতরলিত-তুঙ্গতরঙ্গম্ |
হরিমেকরসং চিরমভিলষিতবিলাসম্
সা দদর্শ গুরুহর্ষ-বশংবদ-বদনমনঙ্গবিকাশম্ ||২৪||
হারমমলতরতারমুরসি দধতং পরিলম্ব্য বিদুরম্ |
স্ফুটতরফেনকদম্বকরম্বিতমিব যমুনাজল-পূরম্ ||২৫||
শ্যামল-মৃদুল-কলেবর-মণ্ডলমধিগতগৌরদুকুলম্ |
নীলনলিনমিব পীতপরাগপটলভরবলয়িতমুলম্ ||২৭||
তরলদৃগঞ্চলবলনমনোহরবদনজনিতরতিরাগম্ |
স্ফুটকমলোদরখেলিতখঞ্জনযুগমিব শরদি তড়াগম্ ||২৭||
বদনকমলপরিশীলনমিলিতমিহিরসমকুণ্ডলশোভম্ |
স্মিতরুচিরুচিরসমুল্লসিতাধরপল্লবকৃতরতিলোভম্ ||২৮||
শশিকিরণচ্ছুরিতোদরজলধরসুন্দরসকুসুমকেশম্ |
তিমিরোদিতবিধুমণ্ডলনির্মলমলয়জতিলকনিবেশম্ ||২৯||
বিপুলপুলকভরদন্তুরিতং রতিকেলিকলাভিরধীরম্ |
মণিগণ-কিরণসমহসমুজ্জ্বলভুষণসুভগশরীরম্ ||৩০||
শ্রীজয়দেবভণিতবিভবদিগুণীকৃতভূষণভারম্ |
প্রণমত হৃদি বিনিধায় হরিং সুচিরং সুকৃতোদয়সারম্ ||৩১||
অতিক্রম্যাপাঙ্গং শ্রবণপথপর্য্যন্তগমন-
প্রয়াসেনৈবাক্ষ্ণোস্তরলতরতারং পতিতয়োঃ |
তদানিং রাধায়াঃ প্রিয়তম-সমালোকসময়ে
পপাত স্বেদাম্ভঃপ্রসর ইব হর্ষাশ্রুনিকরঃ ||৩২||
ভজন্ত্যাস্তল্পান্তং কৃতকপটকণ্ডুতিপিহিত-
স্মিতং যাতে গেহাদ্বহিরবহিতালীপরিজনে |
প্রিয়াস্যং পশ্যন্ত্যাঃ স্মরশরসমাকুতসুভগং
সলজ্জা লজ্জাপি ব্যগমদতিদূরং মৃগদৃশঃ ||৩৩||
জয়শ্রীবিন্যস্তৈমহিত ইব মন্দারকুসুমৈঃ
স্বয়ং সিন্দূরেণ দ্বিপ-রণমুদা মুদ্রিত ইব |
ভুজাপীড়ক্রীড়াহতকুবলয়াপীড়করিণঃ
প্রীর্ণাসৃগ্বিন্দূর্জয়তি ভুজদণ্ডো মুরজিতঃ ||৩৪||