দ্বাদশ সর্গ – সুপ্রীত-পীতাম্বর

গতবতী সখীবৃন্দে মন্দত্রপাভরনির্ভর-
স্মরশরবশাকুতস্ফীতস্মিতস্নপিতাধরাম্ |
সরসমনসং দৃষ্ট্বা রাধাং মুহুর্নবপল্লব-
প্রসবশয়নে নিক্ষিপ্তাক্ষীমুবাচ হরিঃ প্রিয়াম্ ||১||

গীতম্
বিভাসরাগৈকতালীতালাভ্যং গীয়তে

কিশলয়শয়নতলে কুরু কামিনী চরণনলিনবিনিবেশম্ |
তব পদপল্লববৈরি পরাভবমিদমনুভবতু সুবেশম্ |
ক্ষণমধুনা নারায়ণমনুগতমনুভজ রাধিকে ||২||

করকমলেন করোমি চরণমহমাগমিতাসি বিদূরম্ |
ক্ষণমুপকুরু শয়নোপরি মামিব নূপুরমনুগতিশূরম্ ||৩||

বদনসুধানিধিগলিতমমৃতমিব রচয় বচনমনুকূলম্ |
বিরহমিবাপনয়ামি পয়োধররোধকমুরসি দুকূলম্ ||৪||

প্রিয়পরিম্ভণরভসবলিতমিব পুলকিতমতিদূরবাপম্ |
মদুরসি কুচকলসং বিনিবেশয় শোষয় মনসিজতাপম্ ||৫||

অধরসুধারসমুপনয় ভামিনি জীবয় মৃতমিব দাসম্ |
ত্বয়ি বিনিহিতমনসং বিরহানলদগ্ধবপুষমবিলাসম্ ||৬||

শশিমুখি মুখরয় মণিরসনাগুণমনুগুণকণ্ঠনিনাদম্ |
শ্রুতিপটযুগলে পিকরুতবিকলে শময় চিরাদবসাদম্ ||৭||

মামতিবিফলরুষা বিকলীকৃতমবলোকিতুমধুনেদম্ |
মীলতি লজ্জিতমিব নয়নং তব বিরম বিসৃজ রতিখেদম্ ||৮||

শ্রীজয়দেবভণিতমিদমনুপদনিগদিতমধুরিপুমোদম্ |
জনয়তু রসিকজনেষু মনোরমরতিরসভাববিনোদম্ ||৯||

প্রত্যুহঃপুলকাঙ্কুরেণনিবিড়াশ্লেষে নিমেষেণ চ
ক্রীড়াকূতবিলোকিতেহধরসুধাপানে কথানর্ম্মভিঃ |
আনন্দাধিগমেন মন্মথকলাযুদ্ধেহপি যস্মিন্নভূ-
দুদ্ভূতঃ স তয়োর্ব্বভূব সুরতারম্ভঃ প্রিয়ম্ভাবুকঃ ||১০||

দোর্ভ্যাং সংযমিত পয়োধরভরেণাপীড়িতঃ পাণিজৈ-
রাবিদ্ধো দশনৈঃ ক্ষতাধরপুটঃ শ্রোণীতটেনাহতঃ |
হস্তেনানমিতঃ কচেহধরসুধাপানেন সন্মোহিতঃ
কান্তঃ কামপি তৃপ্তিমাপ তদহো কামস্যবামা গতিঃ ||১১||

মারাঙ্কে রতিকেলিসঙ্কুলরণারম্ভে তয়া সাহস-
প্রায়ং কান্তজয়ায় কিঞ্চিদুপরি প্রারম্ভি যৎ সম্ভ্রামাৎ |
নিস্পন্দা জঘনস্থলী শিথিলতা দোর্ব্বল্লিরুত্কম্পিতম্
বক্ষো মীলিতমক্ষি পৌরুষরসং স্ত্রীনাং কুতঃ সিধ্যতি ||১২||

মালদ্দৃষ্টিমিলত্কপোলপুলকং শীত্কারধারাবশা-
দব্যক্তাকুলকেলিকাকুবিকসদ্দন্তাংশুধৌতাধরম্ |
শ্বাসোন্নদ্ধপয়োধরোপরিপরিম্বঙ্গী কুরঙ্গীদৃশো
হর্ষোত্কর্ষবিমুক্তিনিঃসহতনোর্ধন্যো ধয়ত্যাননম্ ||১৩||

তস্যাঃ পাটলপাণিজাঙ্কিতমুরো নিদ্রাকষায়ে দৃশো
নির্ধৌতহধরশোণিমা বিলুলিতাঃ স্রস্তস্রজো মূর্দ্ধজাঃ |
কাঞ্চিদাম দরস্লথাঞ্চলমিতি প্রাতর্নিখাতৈদৃশো-
রেভিঃ কামশরৈস্তদদ্ভুতমভূৎ পতুমনঃ কীলিতম্ ||১৪||

ব্যালোলঃ কেশপাশস্তরলিতমলকৈঃ স্বেদলোলৌ কপোলৌ
স্পষ্টা দষ্টাধরশ্রীঃ কুচকলসরুচা হারিতা হারযষ্টিঃ |
কাঞ্চি কাঞ্চিদ্গতাশাং স্তনজঘনপদং পাণিনাচ্ছাদ্য সদ্যঃ
পশ্যন্তী সত্রপং মাং তদপি বিলুলিতস্রগ্ধরেয়ং ধিনোতি ||১৫||

ইতি মনসা দিগন্তং সুরতান্তে সা নিতান্তখিন্নাঙ্গী
রাধা জগাদ সাদরমিদমানন্দেন গোবিন্দম্ ||১৬||

গীতম্
রামকিরীরাগযতিতালাভ্যং গীয়তে

কুরু যদুনন্দন চন্দন শিশিরতরেণ করেণ পয়োধরে
মৃগমদপত্রকমত্র মনোভবমঙ্গলকলসসহোদরে |
নিজগাদ সা যদুনন্দনে ক্রীড়তি হৃদয়ানন্দনে ||১৭||

অলিকুলগঞ্জনসঞ্জনকং রতিনায়কশায়কমোচনে
তদধরচুম্বনলম্বিতকজ্জলমুজ্জ্বলয় প্রিয়লোচনে ||১৮||

নয়নকুরুঙ্গতরঙ্গবিকাশনিরাসকরে শ্রুতিমণ্ডলে |
মনশিজপাশবিলাসধরে শুভবেশ নিবেশয় কুণ্ডলে ||১৯||

ভ্রমরচয়ং রচয়ন্তমুপরি রুচিরং মম সম্মুখে
জিতকমলে বিমলে পরিকর্ম্ময় নর্ম্মজনকমলকং মুখে ||২০||

মৃগমদরসবলিতং ললিতং কুরু তিলকমলিকরজনীকরে
বিহিতকলঙ্ককলং কমলানন বিশ্রমিতশ্রমশীকরে ||২১||

মম রুচিরে চিকুরে কুরু মানদ মানসজধ্বজচামরে
রতিগলিতে ললিতে কুসুমানি শিখণ্ডিশিখণ্ডকডামরে ||২২||

সরসঘনে জঘনে মম শম্বরদারণবারণকন্দরে |
মণিরসনাবসনাভরণানি শুভাশয় বাসয় সুন্দরে ||২৩||

শ্রীজয়দেববচসি রুচিরে হৃদয়ং সদয়ং কুরু মণ্ডনে |
হরিচরণস্মরণামৃতনির্ম্মিতকলিকলুষজ্বরখণ্ডনে ||২৪||

রচয় কুচয়োঃ পত্রং চিত্রং কুরুষ্ব কপোলয়ো-
র্ঘটয় জঘনে কাঞ্চীমঞ্চ স্রজা কবরীভরম্ |
কলয় বলয়শ্রেণীং পাণৌ পদে কুরু নূপুরা-
বিতি নিগদিতঃ প্রীতঃ পীতাম্বরোহপি তথাকরোৎ ||২৫||

পর্য্যঙ্কীকৃতনাগনায়কফণাশ্রেণীমণীনাং গণে
সংক্রান্তপ্রতিবিম্বসংবলনয়া বিভ্রদ্বিভূপ্রক্রিয়াম্ |
পাদাম্ভোরুহধারিবারিধিসূতামক্ষ্ণাং দিদৃক্ষুঃ শতৈঃ
কায়ব্যূহমিবাচরন্নুপচিতীভুতো হরিঃ পাতু বঃ ||২৬||

যদ্গান্ধর্ব্বকলাসু কোশলমনুধ্যানঞ্চ যদ্বৈষ্ণবং
যচ্ছৃঙ্গারবিবেকতত্ত্বমপি যৎ কাব্যেষু লীলায়িতম্ |
তৎ সর্ব্বং জয়দেবপণ্ডিতকবেঃ কৃষ্ণৈকতানাত্ননঃ
সানন্দাঃ পরিশোধয়ন্তু সুধিয়ঃ শ্রীগীতগোবিন্দতঃ ||২৭||

সাধ্বী মাধ্বীকচিন্তা ন ভবতি ভবতঃ শর্করে কর্করাসি
দ্রাক্ষে দ্রাক্ষ্যন্তি কে ত্বামমৃত মৃতমসি ক্ষীর নীরং রসস্তে |
মাকন্দ ক্রন্দ কান্তাধর ধরণিতলং গচ্ছ যচ্ছন্তি যাব-
দ্ভাবং শৃঙ্গারসারস্বতমিহ জয়দেবস্য বিষ্বগ্বচাংসি ||২৮||

শ্রীভোজদেবপ্রভবস্য বামাদেবীসুতশ্রীজয়দেবকস্য
পরাশরাদিপ্রিয়বন্ধুকণ্ঠে শ্রীগীতগোবিন্দকবিত্বমস্তু ||২৯||