চতুর্থ সর্গ – স্নিগ্ধ মধুসূদন

যমুনাতীরবানীরনিকুঞ্জে মন্দমাস্থিতম্ |
প্রাহ প্রেমভরোদ্ভ্রান্তং মাধবং রাধিকাসখী ||১||

গীতম্
কর্ণাটরাগযতিতালাভ্যাং গীয়তে

নিন্দতি চন্দনমিন্দুকিরণমনুবিন্দতি খেদমধীরম্ |
ব্যালনিলয়মিলনেন গরলমিব কলয়তি মলয়সমীরম্ |
সা বিরহে তব দীনা
মাধবমনসিজবিশিখভয়াদিব ভাবনয়া ত্বয়ি লীনা ||২||

অবিরলনিপতিতমদনশরাদিব ভবদবনায় বিশালম্ |
স্বহৃদয়মর্ম্মণি বর্ম্ম করোতি সজলনলিনীদলজালম্ ||৩||

কুসুমবিশিখরশতল্পমনল্পবিলাসকলাকমনীয়ম্ |
ব্রতমিব তব পরিরম্ভসুখায় করোতি কুসুমশয়নীয়ম্ ||৪||

বহতি চ বলিত-বিলোচন-জলধরমাননকমলমুদারম্ |
বিধুমিব বিকটবিধুন্তুদন্তদলনগলিতমৃতধারম্ ||৫||

বিলিখতি রহসি কুরঙ্গমদেন ভবন্তমসমশরভুতম্ |
প্রণমতি মকরমধো বিনিধায় করে চ শরং নবচূতম্ ||৬||

প্রতিপদমিদমপি নিগদতি মাধব তব চরণে পতিতাহম্ |
ত্বয়ি বিমুখে ময়ি সপদি সুধানিধিরপি তনুতে তনুদাহম্ ||৭||

ধ্যানলয়েন পুরঃপরিকল্প্য ভবন্তমতীবদুরাপম্ |
বিলপতি হসতি বিষাদতি রোদিতি চঞ্চতি মুঞ্চতি তাপম্ ||৮||

শ্রীজয়দেবভণিতমিদমদিকং যদি মনসা নটনীয়ম্ |
হরিবিরহাকুলবল্লবযুবতী-সখীবচনং পঠনীয়ম্ ||৯||

আবাসো বিপিনায়েতে প্রিয়সখীমালাপি জালায়তে
তাপোহপি শ্বসিতেন দাবদহনজ্বালাকলাপায়তে |
সাপি তদ্বিরহেণ হস্ত হরিণীরূপায়তে হা কথং
কন্দর্পহপি যমায়তে বিরচয়ঞ্ছার্দ্দূলবিক্রীড়িতম্ ||১০||

গীতম্
দেশাগরাগৈকতালীতালাভ্যাং গীয়তে

স্নবিনিহিতমপি হারমুদারম্
সা মনুতে কৃশতনুরিব ভারম্ |
রাধিকা তব বিরহে কেশব ||১১||

সরসমসৃণমপি মলয়জপঙ্কম্
পষ্যতি বিষমিব বপুষি সশঙ্কম্ ||১২||

শ্বসিতপবনমনুপমপরিণাহম্
মদনদহনমিব বহতি সদাহম্ ||১৩||

দিশি দিশি কিরতি সজলকণজালম্
নয়ননলিনমিব বিদলিতনালম্ ||১৪||

নয়নবিষয়মপি কিশলয়তল্পম্
গণয়তি বিহিতহুতাশবিকল্পম্ ||১৫||

ত্যজতি ন পাণিতলেন কপোলম্
বালশশিনমিব সায়মলোলম্ ||১৬||

হরিরিতি হরিরিতি জপতি সকামম্ |
বিরহবিহিতমরণেব নিকামম্ ||১৭||

শ্রীজয়দেবভণিতমিতি গীতম্
সুখয়তু কেশবপদমুপনীতম্ ||১৮||

সা রোমাঞ্চতি শীত্করোতি বিলপত্যুত্কম্পতে তাম্যাতি
ধ্যায়তুদ্ভ্রাম্যতি প্রমীলতি পতত্যুদযাতি মুর্চ্ছত্যপি |
এতাবত্যতনুজ্বরে বরতন্র্জীবেন্ন কিন্তে রসাৎ
স্বর্ব্বৈদ্যপ্রতিম প্রসীদসি যদি ত্যক্তোহন্যথা হন্তকঃ ||১৯||

স্মরাতুরাং দৈবতবৈদ্যহৃদ্য ত্বদঙ্গসঙ্গামৃতমাত্রসাধ্যাম্ |
বিমুক্তবাধাং কুরুষে ন রাধামুপেন্দ্রবজ্রাদপি দারুণোহসি ||২০||

কন্দর্পজ্বরসংজ্বরাতুর-তনোরাশ্চর্য্যমশ্যাশ্চিরং
চেতশ্চন্দনচন্দ্রমাঃ কমলিনীচিন্তাসু সন্তাম্যতি |
কিন্তু ক্ষান্তিরসেন শীতলতরং ত্বামেকমেব প্রিয়ং
ধ্যায়ন্তী রহসি স্থিতা কথমপি ক্ষীণা প্রাণিতি ||২১||

ক্ষণমপি বিরহঃ পূরা ন সেহে নয়ননিমীলন-খিন্নয়া যয়া তে |
শ্বসিতি কথমসৌ রসালশাখাং চিরবিরহেণ বিলোক্য পুষ্পিতাগ্রাম্ ||২২||

বৃষ্টিব্যাকুলগোকুলাবনরসাদুদ্ধৃত্য গোবর্দ্ধনং
বিভ্রদ্বল্লব-বল্লভাভিরাধিকানন্দাচ্চিরং চুম্বিতঃ |
দর্পেণৈব-তদর্পিতাধরতটি-সিন্দুরমুদ্রাঙ্কিতো
বাহুর্গোপতনোস্তনোতু ভবতাং শ্রেয়াংসি কংসদ্ধিষঃ ||২৩||